Prins Bryan I

Hallo en alaaf,

Mienge naam is Bryan Wetzels en ich bin 25 joar oad.

Ich woeën va jongs aaf aa i Bóches, ut durp wat vuur mich ummer wie heem veult. Ich bin opjegruijd in ut kerkeveld, in ing hechte familie die mich hat jelierd wat saamhorigheed, betrokkenheed en jezzeligheed écht betseechent. Sinds angerhoaf joar han ich mie eeche hoes op d’r Irenehof. Ing plaatsj woa ich, tsezaame mit mieng vrundin ut Demi, ing richtige heemet va han jemaat.

Ich bin al va klings-aaf-aa lid van de Willemien (G.V. Wilhelmina), unne verein dea mich en mieng familie erg noa aan ut hats liet. Doa bin ich als klinge jong bejonne mit turnen, sjpieder bin ich joa foesballe beij Sportclub ‘25 en WDZ, en oes-endlich wer tserukjekierd beij de willemien um tse joa volleyballen, en woa ich inmiddels och bestuurslid bin. Miene pap is ummer mie vuurbeeld jewea in wie tse mots leave vuur unne verein, jit wat mich nog ummet typeert, die betrokkenheed en dea sjtolz draag ich uvveraal in mit.

In ut jeweun leave werk ich als marketeer, dat past echt jot beij mich. Creatief bezig zieë, verbinge en jit sjuns opbouwen, doa krien ich energie va. Die passie bring ich och uvver op ut vereinsleave. Van ut maache van socialmedia-berichten, posters en logo’s tot ut ongersjteune van evenementen. En dat nit alling beij de Willemien, mer sinds kot och vuur dizze sjunne verein: d’r BVV. En dat dun ich mit veul plezeer en enthousiasme.

Doaneaver han ich unne jeweldige, hechte groep vrung: de NIT.FITS. Unne groep vrung woamit ich jeer op sjtap joan i jen durp, woabeij vuur veul laache en vuural oszelf kinne zieë. Unne cloeb woabeij vrundschaf en jezelligheed ummer vuurop sjtunt.

Carnaval is mich echt mit d’r papliffel i-jejeave. Mieng oma en mieng mam hant mich dat va jongs aaf aa beij jebraat. Als klinge jong loafet ich al verkleijd mit in d’r optsog en vanaaf ut noajoar sjtunt de carnavalslidjes op repeat, joa och onger de douche. Ut is de sjunste tsiet van ut joar: ing periode va vruijd, saamhorigheed en richtige Bócheser jezelligheed.

Dat ich dis joar de ieër han um prins va os sjun Bóches tse zieë, is unne dreum dea oeskunt. En dat jraat in dit jubileumsjoar, 5 X 11 joar BVV maat ut nog ins extra biezonger. Ich veul mich verieërd um in dizze festliche tsezong als jubileumsprins vuurop tse maache joa. Ich kin nit in weud beschrieve wieveul zeen ich han in dizze tsezong. Tsezaame mit ut janse durp junt vuur d’r ing onverjesliche carnaval va maache. Ing carnaval die vuur mit z’n alle, mit hatz en ziel junt beleave.

Bóches alaaf!

Bryan I