Bitste carnavalisten va Bóches en umstreken,

Vuur zunt Prins Dion I en Prinses Simone I va BVV Kalk aan de Books K.E. en vuur wille os jeer aan uuch vuursjtelle. Vuur zunt al mieë wie 6 joar saame en woene de litste 2 joar op de Bócheserhei saame mit ozze honk d’r Teddy.

Dion I
Iech bin d’r Dion Derwall, 30 joar, en al mie janse leëve unne Bócheser jong. Opjegruid in ut Kerkeveld saame mit mienge pap en mam, d’r John en ut Marian, en mienge broor d’r Dennis.

Carnaval is os va jongs of aa mit d’r papleffel injejeave. Mienge pap (1977) en mienge broor (2002) zunt alle-tswei Jeugdprins jewea en zelf vier iech al mie janse leeve carnaval in os sjun Bóches. Vanaaf 11-11 jeet mie vasteloavendshats da och ummer wer jit sjneller kloppe en bin iech beij onjeveer alle carnavalsactiviteiten tse vinge. Als jonge jong bin iech joare lid jewea van d’r Jeugdroad en ongertusje vier iech al joare de carnaval mit mieng vrung. In 2022 bin iech “Sjwatse Reakel” jewea, mer ut is ummer mienge dreum jewea um nog ins groëse Prins va Bóches tse weade, en dis joar kunt dea dreum oes!

In ut jeweun leave bin iech al 10 joar in deenst beij Frijns Steelconstructions i Valkenburg als calculator. In mieng vreij-tsiet kinse mich miestal beij Sportcloeb’25 vinge, woa iech al 25 joar actief lid bin en op ut 2de sjpil. Doa-neaver bin iech och nog betrokke bei é aantal anger activiteiten binnen d’r verein, woa-onger op dit moment ut 100-joarig besjtoa, wat vuur i Juni groeëts junt viere. Och joan iech mich jeer inge drinke mit mieng vrung in de kantien of urjens i j’n durp, en doabei dun iech miestal als litste ut lit oes.

Simone I
Mienge naam is Simone Smeets, 29 joar. Ich woeën noe onjeveer 6 joar i Bóches, mer bin opjegruijd i Landgraaf, tsezaam mit mienge pap Léon, mieng mam Adelé en mie breurtje Paul. Va klings-of-aa han iech ummer carnaval jeviert mit mieng mam en de oma, miestal in Landgraaf en Kirchroa, mer ongertussje vier iech al 5 joar carnaval i Bóches. In mieng jonger joare bin iech Jeugdprinses van de basissjoeël jewea en vanaaf toen han iech durva jedreumd nog ins groësse Prinses tse weade!

In mieng vrij-tsiet bin iech och veul beij Sportcloeb ’25 tse vinge, als vrijwilliger of wint d’r ee fest is. Iech tennis beij TC Bocholtz en sport beij de Bodyfactory i Voerendaal. Vuur de rest wandel iech jeer mit ozze honk Teddy en dun iech jeer sjpeltjer. Iech bin sinds 1,5 joar aan ut wirk beij de jemingde Heële als consulent inkomen.

Mie motto is: Saame is alles leuker! Lotte vuur da och tsezaame d’r ing sjun vasteloavend va maache.

Vuur kieke oes noa unne jeweldige seizong mit uuch en hoffe uuch allemoal beij alle evenementen tse moage begrusse.

Bóches Alaaf!

Prins Dion I & Prinses Simone I