Noa bow 18 joar is ut aan de tsiet dat der Bocheser Vasteloavends Verain Kalk aan de Boks inge nujje President jekoazze hat. Ich han de jroesse ier um derjinnige tse zie dea verkoaze is: 

Mich is jevroagd woede um miech effe vuur tse sjtelle aan de luuj van Boches zoedat ooch jidderinge wees wea zich doa de veere aa je mease hat en vuuroop wil joa in der Bocheser Vasteloavend. 

Vuur veul luuj zal ich wal nit jans onbekannt zie mer ich jon uuch probeere ee sjtuksje mit tse neame:  

Mienge naam is Pascal Andriolo, bin jeboare in de Winkbuule sjtad Heale bej de voedvrouwe op der Karnevalszondig in 1974. Doanoa hat de mam miech direkt te mang noa Boches braat woa ich bis huuj moag woene mit mieng vrouw ut Shareen (Eeser Bock) en mieng  doater ut Liene. 

Vanaaf 1994 bin iech aktief in ut Bocheser Verains leave. Jestart bej der Wielerverain, uvver der Badmintonkloeb BBC’77 uiteindelijk ooch in 2001 bej der Foesbalkloeb Sjportkloeb’25 Vuurzitter jewoede en dat bin ich huuj nog ummer. Vroagt miech nit tse veul vaan Sjport; doa han ich jee versjtank va. De dreijde helft woar vuur mich ummer al de betste helft. 

Boese der Foesbalverain han ich al jans jit Tentefeste mit moage regele;  Probere vier nog jit tse maage van der Verenigingsraad en moag ich al 10 joar mit joa wint der Geitenfok, Zang en Zuip Vereniging Sankt Prosit der Bocheser Vasteloavend in de durpe um oos herum moag oesdraage. 

Natuurlijk besjteet ut leave nit alling oes verains en sjpass maache: ut mos ooch nog jild verdeent weade!  Dat probeer ich al bow 30 joar tse doe mit oos Kantoer AVS – Adviseurs in Zumpelveld woabej vier advisere in Versicherunge, Hypotheken en Finanzen. 

Vuur wat betrift de Vasteloavend woar der sjroam al flot jezats; wint me oop inge Karnevalszondig jeboare is, da kint ut ja bow nit angesj daan dat me vaan vasteloavend hilt! 

Vasteloavend viere vier saame, is oos motto en doa wil ich langs dizze weg daan ooch nog ins inge ooproof vuur doe! Inge jroesse wunsch is ut um nog mie verains en nog mie Bocheser Luuj werm aktief tse kriege in der Bocheser Vasteloavend. 

Leef luuj, kiekt ins wie sjun ut in oos Boches is. Ut weade oop jans veul plaatsje sjun oavende vuur uuch inee jesats. Wint ut ee biesje jeet: jut noa uung wiedsjaf, uunge verain en bezukt vuural ooch de proklamtioens sietzonge. Komt noa der Ooptsoch en viert mit oos mit! 

Doamit vier sjoots droop kanne zie inge Bocheser tse ziëe!! 

Boches ALAAF !!!